KD 1 BAB PARAMASASTRA (Kelas XI)

 PARAMASASTRA

Tembung Rangkep

Tembung rangkep utawa reduplikasi basa jawa cacahe ana telu, yaiku dwipurwa, dwilingga, lan dwiwasana. Tembung rangkep kasebut bakal karembug ing ngisor iki;

A. Dwipurwa

Dwipurwa iku tembung kang dumadi saka pangrangkepe purwane  tembung lingga utawa pangrangkepe wanda kawitaning tembang. Tuladhane kaya ing ngisor iki.

bungah  >     bubungah   >    bebungah

lara        >     lalara          >    lelara

gaman   >     gagaman     >    gegaman

bendhu  >     benbendhu  >    bebendhu

resik      >     reresik

tenger    >     tetenger

Tembung andhahan kang asale saka tembung lingga kaater-ateri a- (Nasal) bisa didadekake dwipurwa. Tuladhane;

pangan          >     mangan     >     mamangan     >     memangan

tukang           >     nukang      >     nunukang      >      nenukang

suwun           >     nyuwun     >      nyunyuwun   >      nyenyuwun

kemil            >     ngemil       >      ngengemil

dwipurwa bida ndhapuk tembung aran utawa tembung kriya lan duwe teges 'nindakake sawijining bab kaya kang kasebut ing linggane tembung'. Bisa uga ngemu teges 'ndadekake sawijining bab dadi kaya kang kasebut ing linggane tembung'.

bungah     >     bebungah

reged        >     rereged

suker        >     sesuker

lara           >     lelara

wadi         >     wewadi

resik         >     reresik

suci          >     sesuci

takon        >     tetakon

tuku          >     tetuku

geni          >     gegeni

Tembung bungah, reged, suker, lara, lan wadi, kalebu tembung sifat, nanging bareng owah dadi bebungah, rereged, sesuker, lelara, lan wewadi, tembung iku malih dadi tembung aran. tembung resik lan suci kalebu tembung sifat, tembung takon lan tuku kalebu tembung kriya, lan tembung geni kalebu tembung aran. bareng dadi reresik, sesuci, tetakon, lan tetuku tembung iku kabeh owah dadi tembung kriya. Dwipurwa kang ndhapuk tembung kriya ngemu teges terus-terusan utawa intensitas.

reresik 'terus-terusan anggone reresik'

sesuci 'terus-terusan anggone suci'

tetakon 'terus-terusan anggone takon'

gegeni 'terus-terusan anggone ning ngarep geni'

sarehne kalebu golongane tembung, dwipurwa bisa diwuwuhi imbuhan, nanging mung bisa kawuwuhi ater-ater lan panambang. seselan -in lan -um ora bisa sumambung ing dwipurwa. tuladhane kaya ing ngisor iki.

di-         +     tetangis     +     -i        >     ditetangisi

di-         +     lelara                          >     dilelara

Ang-     +     geguyu                       >     Nggeguyu

An-       +     dedawa                       >     ndedawa

tetenger     +     -an     >     tetengeran

geguyu      +     -an     >     geguyonan

B. Dwilingga

Dwilingga yaiku tembung lingga kang dirangkep. pangrangkepe tembung lingga iki ana kang karangkep wutuh kang ana kang karangkep mawa owah-owahan swara. Tembung lingga kang karangkep wutuh sinebut dwilingga padha swara lan kang karangkep mawa owah-owahan swara sinebut dwilingga salin swara.

Tuladha ing ngisor iki kang (a) kalebu dwilingga padha swara lan kang (b) kalebu dwilingga salin swara.

(a) takon     >     takon-takon

     gedhe     >     gedhe-gedhe

(b) takon     >     tokan-takon

      gedhe    >     gedha-gedhe

ana tembung sing wujude memper tembung dwilingga lan dwilingga salin swara, nanging sejatine ora kagolong tembung dwilingga utawa dwilingga salin swara. Ing ngisor iki tuladhane.

(c) abang - abang

      ondhe-ondhe

      arem-arem

      anting-anting

      alun-alun

(d) ontang-anting

      gojag-gajeg

      grusa-grusu

      wora-wari

      wira-wiri

Tembung (c) lan (d) ing dhuwur ora kalebu tembung dwilingga sebab tembung-tembung kasebut ora bisa diluru utawa digoleki linggane, saumpama bisa digoleki linggane surasane mesthi beda banget karo tembung dhapukan kasebut. 

Sarehne kalebu golongane tembung, dwilingga bisa diwuwuhi imbuhan kang awujud ater-ater, seselan lan panambang.

jambak     >     dijambak, njambak, kajambak

                        jambakan, jambake, jambakna

                        jinambak-jambak

                        jambak-jinambak

balang     >     dibalang, mbalang, kabalang

                       balangan, balangke, balangna

                       binalang, balang

                       balang-binalang

gelar      >      digelar, nggelar, kagelar

                      gelaran, gelarke, gelarna

                      ginelar-gelar

                      gelar-ginelar

C. Dwiwasana

Dwiwasana iku tembung kang ngrangkep wanda wekasan utawa ngrangkep wasanane tembung. tuladhane katon kaya ing ngisor iki

cingak     >     cingakngak     >     cingangak     >     cengingak

cengis     >      cengisngis      >     cengingis

cekak      >      cekakkak        >     cekakak

Dwiwasana kagolong tembung rangkep semu awit antarane tembung dwiwasana lan linggane surasane geseh adoh. saumpama ana tegese, dwiwasana ngandhakake bab kang ora gumathok utawa ora ajeg, nanging bisa uga ngemu teges ambal-ambalan.

Matur nuwun.

Tugas: Absen kanthi menehi pitakonan ana ing kolom komentar ing GC (Google Classroom!