KD 2 PERTEMUAN 2 (XII)

 D. Nulis Teks Geguritan

Kegiyatan : Ngembangake gagasan kanthi nulis teks geguritan.

Nganggit geguritan sejatine ora angel, angger padha gelem nindakake. Dene kanggo paugeran anggone ngrakit geguritan miturut reseo saka Mas Sunarko Sodrun (Sanggar Triwidha) kaya mangkene.

1. Ngematake barang lan kahanan sing disawang utawa ndhudhah pengangen sing arep ditulis.

2. Milih tema sing gumathok, banjur diterusake nulis irah-irahan.

3. Mekarake dadi crita.

4. Ngrakit ukara urut saka dhuwur terus mudhun mangisor, sagatra utawa saklarik saukara cekak.

5. Ukara utawa tembung sing dirasa utawa dianggep durung trep bausastrane lan basane diowahi utawa diganti nganggo tetembungan utawa ukara kang luwih apik, nduweni intensitas makna sing luwih kuwat lan mantep, sarta luwih imajinatif. Umpamane tembung langit bisa diganti dadi wiyadi; jagad dadi rat; godhong-godhong dadi gegodhongan; ngguyu dadi esem ngujiwat; lan sapiturute.

6. Bisa nggunakake gaya bahasa, pepindhan, utawa dasanama, saengga ngasilake crita sing cekak aos, pas, lan nduwe kaendahan swasana.

Tuladha:

Proses panulise geguritan sawise ngematake lawang mbok menawa bisa nemokake crita mangkene;

1. Lawang iku digawe saka kayu jati, pinus, utawa triplek;

2. Tinggalane bapak;

3. Ana kuncine utawa slot merek jaran;

4. Lawang akeh gunane;

5. Kanggo sendhen;

6. Kanggo mlebu metu;

7. Kanggo ngenteni kanca tamu;

8. Saben wektu takbukak;

9. Saben wektu taktutup;

10. Ora lali saben wektu uga takkunci;

11. Mak clek unine;

12. Cecak mati kecepit;

13. Lan sapanunggalane.

Saiki yen wis dadi ukara-ukara iku, mbokmenawa wae yen didadeake geguritan dadine:

1. Kori Iki

    Kori iki ginawe saka kayu jati, pengkuh

    Slot gambar jaran, rosa 

    Takgondheli saben wektu

    Uga kanggo sendhen, leren

    Yen engsele rusak datan kena dienep

    Lawang iki dalane wong mlebu metu

   Ora saben pawongan bisa mlebu lan metu

2. Lawang 

    Brak!!

    Lawang takbanting rosa.

    Embuh!?

    Sumpeg rasane atiku, dina iki.

    Ah,.... Kok mesakake.

    Aja-aja ana cecak kejepit lawang.

    Mati.

Tugas.

1. Gawea geguritan kanthi tema "Nasionalisme"!
2. Tugas geguritan mau dikirim ana ing GC (Google Classroom), uga minangka kanggo absen!

Nuwun.