PARAMASASTRA KELAS XII

 TEMBUNG CAMBORAN

Tembung camboran utawa kata majemuk (kompositum) yaiku tembung loro utawa luwih sing digandheng dadi siji lan tembung mau dadi tembung anyar kang teges uga melu anyar. sing dikarepake teges anyar ing kene yaiku tegese tembung mau beda karo tegese tembung nalika isih awujud tembung lingga. Tembung camboran bisa diwuwuhi imbuhan apa wae. Tuladhane kaya ing ngisor iki;

lareangon                 > arane ula

Maratuwa                 > wong tuwane bojo

Buntut urang            > rambut kang njenthir ing githok

dawa tangane           > clemer

Anteng kitiran          > angel dibedhek

Tembung camboran bisa dibedakake dadi loro, yaiku

Camboran Wutuh

Tembung camboran wutuh yaiku tembung camboran kang dumadi saka tembung-tembung kang isih wutuh. Tuladhane kaya ing ngisor iki;

Dhadha menthok

Gantung siwur

Wedhak pupur

randha royal

semar mendem

raja lele

kalamenjing

sisikmelik

nagasari

Yen kawuwuhi imbuhan, proyogane imbuhan kasebut kadunungake ing pungkasan tembung lan aja kawuwuhake ing tengah utawa ing antarane tembung-tembung kang ndhapuk tembung camboran. Yen imbuhan kawuwuhake ing tengah tembung, tembung camboran bisa ngemu teges liya utawa bisa nuwuhake teges kang beda.

Tuladha;

dhadha menthoke            > dhadhane menthok

gantung siwure                > gantunge siwur

wedhak pupure                > wedhake pupur

randha royale                   > randhane royal

semar mendeme               > semare mendem 

lsp

Camboran Tugel

camboran tugel yaiku tembung camboran kang dumadi saka tembung kang isih wutuh lan tembunge wancahan, utawa kabeh tembung camboran iki kabeh dumadi saka tembung wancahan. Tuladhane, yaiku;

panstis        >  panas        +     atis

naksanak    >  anak          +     sanak

botrepot      >  abot          +     repot

kakkong     >  tungkak     +    bokong

lunglit        >  balung       +    kulit

tembung camboran duwe teges werna-werna, ana kang tegese owah babar pisan; ana kang tegese mringkus (spesifik); ana kang tegese mbangetake (intensitas); ana uga kang tegese sanepan (kiasan).

1. Tembung camboran kang tegese owah kabeh.

     Tuladha :

     semar mendem  : arane panganan saka ketan

     randha royal      : tape goreng

     lareangon          : araning ula

     raja lele             : aran beras kang enak

     lsp

2. Tembung camboran kang tegese mringkus.

     klengkeng lanang     :  wit klengkeng kang ora tau woh

     salak kembang         :   wit salak kang ora tau woh

     wedhus kacang         :  wedhus kang ora bisa gedhe

     tela gantung              :  gandhul utawa kates

3. Tembung camboran kang tegese mbangetake.

     ireng thuntheng        : ireng banget

     tumpuk undhung      : tumpuk-tumpuk

     peteng ndhedhet       : peteng banget

     lsp..

4. Tembung camboran kang tegese sanepan.

     Nyolong pethek        : ora ngira

     kembang lambe        : dadi grenengan

     kuping wajan            : ndableg 

     gedhe ndhase            : umuk

     dawa tangane            : clemer

Tugas : Absen ana ing forum GC kanthi nyebut jeneng lan nomer absen!

Nuwun.